وفاق المدارس العربیہ پاکستان کا
حضرت مولانا حامد الحق حقانی شہید کی شہادت پر اعلامیہ
مولانا اسامہ سمیع
عالم اسلام کی عظیم وقدیم دینی درسگاہ جامعہ دارالعلوم حقانیہ اکوڑہ خٹک کے نائب مہتمم مولانا حامد الحق حقا نی ۲۸فروری کو نماز جمعہ کی ادائیگی کے بعد حملہ میں شہید ہوگئے،ان کے علاہ پانچ دیگر افراد بھی شہید ہوئے جبکہ بیس سے زائد زخمی ہیں۔ تین دہائیوں سے زائد درس و تدریس میں آپ کے ہزاروں تلامذہ اس وقت دنیا بھر میں موجود ہیں۔مولانا سمیع الحق ؒکی شہا دت کے بعد ان کے چھوٹے بھائی اور وفاق المدارس العربیہ پاکستان کے سینئر نائب صدر مولانا انوار الحق کو جامعہ دارالعلوم حقانیہ کا مہتمم اور مولانا حامد الحق شہید کو نائب مہتمم مقرر کیا گیا۔مولانا حامد الحق شہیدؒ نوشہرہ سے قومی اسمبلی کے رکن بھی منتخب ہوئے تھے،جبکہ اسلامی نظریاتی کونسل کے رکن کی حیثیت سے بھی ذمہ داریاں انجام دیں۔مولانا حامد الحق شہیدؒ کو نماز جمعہ کی ادائیگی کے بعد مسجد میں حملہ کا نشانہ بنایا گیا جس میں کئی افراد زخمی بھی ہوئے، ہسپتال لے جایا گیا مگر زخموں کی تاب نہ لاتے ہوئے جان جان آفرین کے سپرد کردی۔ان کی شہادت کی خبر سے دنیا بھر کے دینی و علمی حلقوں میں فضا مغموم ہوگئی۔ مولانا حامد الحق کی شہادت پر وفاق المدارس العربیہ پاکستان کے صدر مولانا مفتی محمد تقی عثمانی،ناظم اعلیٰ مولانا محمد حنیف جالندھری،نائب صدور مولانا عبیداللہ خالد، مولانا سید سلیمان بنوری، مولانا سعید یوسف، صوبائی نظماء مولانا حسین احمد، مولانا امداداللہ یوسف زئی،مولانا صلاح الدین ایوبی،مرکزی ناظم دفتر مولانا عبدالمجید سمیت اراکین عاملہ ودیگر منتظمین نے وفاق المدارس کے سینئر نائب صدر مولانا انوار الحق سے ان کے بھتیجے مولانا حامد الحق کی شہید پر گہرے رنج و غم کا اظہار کیا،نیز مولانا راشد الحق،مولانا عبدالحق ثانی سمیت تمام افراد خاندان سے مسنون تعزیت کا اظہار بھی کیا گیا۔اس موقع پر قائدین وفاق المدارس نے عظیم دینی ادارہ کی جامع مسجد پر حملہ کو بہیمانہ دہشت گردی قرار دیتے ہوئے دنیا بھر کے دینی و علمی حلقوں کیلئے ایک افسوسناک سانحہ بھی قرار دیا۔قائدین وفاق المدارس نے حکومت اور ریاستی اداروں سے فوری طور حملہ آوروں کے سرغنوں کا پتہ لگا کر فی الفور کیفر کردار تک پہنچانے کا مطالبہ بھی کیا۔
